|
|
|
Babhaxabulwe kabuhlungu abafana beS’thende
IQEMBU elidlala ngaphansi kwePSL AmaZulu FC athele ngehlazo iqembu labafana besithende ngesibhaxu samagoli amabili eqandeni emdlalweni we-ABSA Premiership obuseKing Zwelithini Stadium eMlazi ngoLwesithathu ebusuku.
Iqembu le-Lamontville Goldern Arrows sekungokwesithathu libhaxabulwa ngamaqembu ePSL kulandelana emva kokuthi leli qembu belishaya kwasani emaqenjni phambilini.
Amagolo eqembu laMaZulu ebelithokoze kakhulu kulandela ukubamba ufishi omkhulu ashaywe omabili esiwombeni sokuqala eshaywa umgadli waleli qembu uCollins ‘Big Animal’ Shabalala. Elokuqala ulivalele enethini wasala ekemile unozinti we-Arrows ngomzuzu ka-16. Kusenjalo nje bekungakapholi namaseko uphinde walivalele phakathi elesibili ngomzuzu ka-20.
Lo mdlalo obushisa bhe ubuwavuna womabili la maqembu njengoba uSuthu olumabheshu ankone belungashaya imbudle yamagoli ukuba liwasebenzisile amathuba abelokhu etholakala njll, njengalokhu omunye umgadli uDumisani Ngwenya ubeshweba elingisa uBrad Riitson naye obevele adlale ngegeja kuziliwe nje behlulwa izimbuzi.
Kanti nabo Abafana besithende bekusho khona nje ukuthi bazalelwe inja endlini, kwazise phela basenodume lwengozi engeqiwa ntwala emuva kokuthi beshaywe iqembu le-SuperSport kuyo le nkundla yaseMlazi ethathwa njengeyasekhaya kubo, kanti phambilini babuya nenduku yombangandlala emuva kokuthelwa ngesibhaxu iqembu leKaizer Chiefs elabe livutha lingabaselwe eGoli.
Umqeqeshi we-Lamontville Goldern Arrows uManqoba Mgqithi uyivumile induku njengalokhu etshele abezindaba ukuthi kungenzeka ukuthi bekungesilona usukulwabo.
“Amathuba esiwatholile sehlulekile ukuwasebenzisa ukube bekuwusuku lwethu besiyoshaya inqwaba yamagoli,” kuchaza uMgqithi. Akatholakalanga umqeqeshi wamaZulu FC ukuthi aphawule kuze kwashaya isikhathi sokushicilele engatholakali ehhovisi lakhe laMaZulu.
Iqembu labafana besithende lisalele isithathu kwi-Log yeABSA, nosekuhlalise abalandeli kanye neqembu lonkana ovalweni lokuthi lingase lehle ngokwezinombolo libheke phansi uma lingakhuphulanga amasokisi liqhubeke nebhola lalo ebelidida amanye amaqembu.
|
|
