|
|
|
Kukhulekelwe ubugebengu nokukuthula KwaMashu
Ukukhuphuka ngamandla kwezibalo zezehlakalo zobugebengu elokishini laKwaMashu kuholele ekutheni amalungu omphakathi kanye neKhansela lendawo babize ukhukhulelangoqo womkhuleko obekuhloswe ngawo ukucela uMdali ukuthi aqede ubugebengu.
Lo mkhuleko ububanjelwe enkundleni yezemidlalo i-Rotary esigcemeni sakwa-A ngeledlule. Phakathi kwabebe hambele lomkhuleko, abaholi bezinhlaka ezahlukene, amalungu omphakathi kanye nabamaBandla ezeNkolo ehlukene.
Kulomkhuleko, amaBandla ezeNkolo abesina ngokudedelana, abanye basina umgidi weNkolo yoMdabu abanye bedumisa ngendlela yaseNtshonalanga. Abanye bebethandaza baze babuke esibhakabhakeni sengathi sebelibona ngamehlo iZulu.
Amalungu omphakathi abehambele lomcimbi asho ngazwi linye ukuthi ubugebengu busezingeni eliphezulu kuleli lokishi. Muva-nje izigilamkhuba zigasela endlini bese zibulala labo abangaphakathi maqede zithathe yonke impahla. Elinye ilunga lomphakathi lithe nalo selike lahlaselwa lathathelwa nempahla yasendlini. Lona wesilisa igama lakhe eligodliwe, utshele leliphephandaba ukuthi lezigelekeqe zihamba ziyiqulu futhi zigxila ikakhulukazi kubantu abaziwayo ukuthi bane mali emphakathini.
Okhulumela amaphoyisa aKwaMashu uConstable Bonisiwe Nxumalo uvumile ukuthi zike zaba khona izigameko zobugebengu Kwamashu kodwa uthe sekwehlile.
"Selokhu kusungulwe uhlelo olulwa nobugebengu olwaziwa nge-Bophazonke, izigameko zobugebengu sezithanda ukwehla. Siyethemba-ke nomkhuleko obukhona uzokuba nelikhulu iqhaza ekushintsheni isimo saKwaMashu," echaza. Uthe ngaphambilini amaphoyisa akwazile ukubopha abanye abasolwa nosekuholele ekwehleni kwezinga lobugebengu.
Uphinde wanxusa umphakathi ukuba usebenzisane namaphoyisa ukuze kunqandwe ubugebengu.
Ngenyanga edlule kudutshulwe kwabulawa amadodakazi amabili omndeni wakwaMaphumulo.
Ngokwemibiko yamaphoyisa laba ababili badutshulwa esigamekwenin okusolakala ukuthi esokubamba inkunzi. Kuboshwe abasolwa abane abathintekayo kulesi gameko, baphinda bavela eNkantolo kaMantshi eVerulam.
|
|
