|
|
|
Kutholwe izidumbu (2) emathuneni
AMAPHOYISA aseMlazi athole ngezidumbu ezimbili zabesilisa okukholakala ukuthi zineminyaka engama-20 zigobondiswe ngobuso zabheka phansi izandla ziboshelwe ngemuva emathuneni ase-17 kwaT ngeledlule.
Isakhamizi esingadalulwanga ngegama sibikele amaphoyisa ngalo mhlola sathi, sizwe kuqhuma isibhamu amahlandla amaningi emini kwa bha ngoLwesine nokuthe kamuva sayobheka lapho kuqhuma khona isibhamu safike sazithela kule nsambatheka, savele sangapholisa maseko sabikela abomthetho.
Kanti namanye amalungu omphakathi azibonele lo mhlola athuke kwaphela nasozwaneni ngesikhathi ebuka izidumbu zamadoda angaziwa zidindilize eduze kwamathuna.
Okhulumele amaphoyisa aseMlazi uSupt Danelia Veldhuizen uthe amaphoyisa alunywe indlebe ukuthi kukhona izidumbu esezitholakale eduze namangcwaba
ase-17. “Amaphoyisa azithole izidumbu kuleya ndawo, lezi zidumbu beziboshwe ngokusantambo kagesi ezandleni, zibheke phansi ngobuso.
Bezinamanxeba okudutshulwa afanayo emakhanda nasezintanyeni. Laba ngabesilisa abangakaziwa kuze kube manje, kodwa amaphoyisa asaphenya. Sicela noma ngubani ongaletha ubufakazi noma ongase azohlonza lezi zidumbu.
Oza nosizo angaxhumana noSupt Max Khumalo kule nombolo: 031-908 0034 noma azifikele yena mathupha,” kuphetha uSupt Veldhuizen wasesiteshini samaphoyisa eMlazi kwaV.
|
|
