|
|
|
Sekubulawe abantu abane kwaE eMlazi
KUKHONA okudla amantshontsho emsamu, amaphoyisa aseMlazi kwaV anxusa wonke amalungu omphakathi waseMlazi ukuthi alethe ubufakazi obungaholela ekutheni kuboshwe ababulali abazithathele umthetho ezandleni zabo ezehlakalweni ezimbili ezahlukene lapho kwesinye kubulawe ngokushiswa abesifazane ababili ngeSonto ntambama kwathi ababili besilisa bona badutshulwa babulawa eMlazi kwaE ngoMsombuluko kusihlwa.
Okhulumela amaphoyisa aseMlazi USupt. Danelia Veldhuizen uthi amaphoyisa alunywe indlebe ukuthi awaphuthume kuleya ndawo ngeSonto afike azikhweza phezu kwezidumbu ezimbili zabesifazane ebesezishisiwe, nokusolakala ukuthi kwenziwe iqulu labantu ebelithukuthele lithelwa ngamanzi.
Kusenjalo nangoMsombuluko azithele phezu kwezidumbu zamadoda ebezinamanxeba okudutshulwa, “Laba ababulewe bobane bayizakhamizi zakhona lapha kwaE. Njengamanje kusaboshwe umsolwa oyedwa wesilisa ngesigameko salabo ababulewe ngokudutshulwa. Amaphoyisa asaqhubeka nokuphenya,” kuphetha uSupt. Veldhuizen.Uqhube wathi kwabesifazane ababulewe uDanisile Ngcobo (39) noThandi Hlophe (49) uthi abesilisa balinganiselwa eminyakeni engu-20-kuya phezulu bona bango Madiba Bhekamali Madiba noSiboniso Nkosi, bonke ngabakwaE.
Kuzokhumbuleka ukuthi kuleya ndawo yakwaE kusanda kubulawa uMfundisi obeyilungu lokuqina le-ANC kuleya ndawo nokusathukuthelise umphakathi wakuleya ndawo.
Kanti uMphakathi wakwaE unezinkinga eziningi. Akukapholi maseko nje lo Mphakathi ubikele amaphoyisa kanye namalungu esiShayamthetho sakwaZulu-Natal ngalezi zinkinga eziwukhungathile embizweni eyabe isehholo lwakwaV ngenyanga ephelile.
|
|
